Tulanijuan: Ang Mga Tula ni Juan

Aniaa na pod si Undo.
Kaanindot sa iyang barog.
Tan-awa ra god, gikan sa ulo padulong sa iyang mga tiil.
Unsa bay tindog sa usa ka ulitawo!
Ulitawo na gyod si Undo!

Aroy Undo! Asa na sad ka paingon?
Imong inahan nag-ingon, dili magpalabi.
Kanang si Inday ayaw og pasagdi.
Kay kun madigrasya, ikaw gyod ang responsable.
Pagbantay-bantay gyod Undo.

Asa na pod ka?
Bestfriend na sad na?!
Kagahapon si Juan, karon na sad si Pedro?
Aw, wala koy gihisgot nga dautan.
Atimana sad imong kaugalingon dong.

Hala nangita si Inday.
Asa na sad diay ka nilakaw?
Murag nag-abusar na sad ka sa imong kaugalingon.
Lawas ray puhonan dong, busa pahulay sad.
Nganong kabuntagon na sad ka makadumdum?

Unsa man ang Gugma sa imong pagkahibalo?
Ang Gugma ba nga aduna kay gusto sa usa ka tawo
O ang Gugma nga wala ka nahibalo nga kalit lang nga imong matagamtaman?
Kalibog ba gud sa gugma kung unsa man gyod kini nga butang.
Ang butang sa kalibutan nga walay kahanturan
O ang butang nga kalit lang mahanaw sa pagkahuman sa tanan.
Makaingon ba kag ikaw nahigugma?
Nahigugma sa bag-o lang nimo nga higala?
Apan, tagamtami lang una ang imong kasing-kasing...
Niingon ba syag, "Mao na kini ang Gugma."
Kanus-a ba kag makakaplag nga mao na kana ang tinood nga Gugma?
Paminawa usa ang imong kaugalingon og kasing-kasing.
Sa oras nga magkasinabot na sila,
Usa pa ka mo-ingon, "Mao na kini! Og busa nahigugma ako kanimo!"
Nahiguma ako kanimo.